Hola a toos y toes. Otru día más de confinamientu que superamos y, últimu día de clase dende casa, porque a partir de mañana teneis les vacaciones de Selmana Santa. Unes vacaciones que van ser un poco diferentes, pero, de toles maneres intentai pasales lo meyor posible.
Pa estos díes, Alicia y yo queremos proponevos una actividá (nun ye algo obligatorio, pero si nos prestaría que participarais nesto). Cuéntovos....
Como esti añu nun vais poder cellebrar los Güevos Pintos, proponémosvos que, pa que nun escaezais esta folixa tan típica de Llangreu y tamién de Sieru; que faigais en casa ¡un güevu pintu!. Si, lleisteis bien, UN GÜEVU PINTU.
Y entrugaréisvos ¿y cómo lo facemos?
Pos bien, agora vos lo esplicamos. Podeis facelo de delles formes: de manera tradicional, ye dicir, con un güevu de verdá cocíu; otra manera sería nuna fueya dibuxar el güevu y decoralu al gustu de caún y caúna, el que nun s'atreva col güevu de verdá. Tamién podéis facer el güevu con plastilina, pasta de sal, etc. En definitiva, como querais o meyor se vos arregle colos materiales que tengáis por casa. En cuanto a la decoración, va ser llibre. Podeis decorar con dibuxos tradicionales asturianos, otros dibuxos que vos presten o incluso con algo referente  a esta situación que tamos viviendo col coronavirus. Y podéis pone-yos tamién una dedicatoria tipo refrán, cosadiella, un pequeñu poema, etc. ECHÁI A ESNALAR EL MAXÍN.
Proponémosvos otru retu más...... A ver que vos paez. Prestaríanos qu'esta actividá la pudierais compartir colos pas, hermanos o güelitos, con quien teis pasando estos díes de confinamientu. O sea, qu'ellos tamién faigan un güevu pintu.
Cuando too esto tea fecho (ensin priesa) podéis mandanos les semeyes a los nuestros correos que tenéis na páxina web del cole na parte de les tarees; o incluso vidios tamién; pa que nosotres podamos colgalo nel blog y asina toos y toes podáis disfrutar d'ello.
Con tol material que mos mandéis queremos facer un pequeñu concursu, que sabemos que vos presta abondo, y ya vamos viendo como facemos pa los premios dependiendo de como vaya desarrollándose esta situación.
Ah, y como non, habrá que poner un nome a esta actividá ¿non? ¿Qué vos paez "Coronagüevos"? Ye gracioso eh, y lo que más mos fai falta estos díes ye riímos, asina que....CORONAGÜEVOS.
Y ya, pa finar esta actividá, amás de facer los güevos pintos vais tener qu'investigar un poquiñín sobre esta folixa tan guapa. Podéis mirar n'interné, entrugar a la familia,....y colo que descubrais del tema facer una redaición, o tamién puede ser en forma de cuentu, como prefiráis. El casu ye conocer un poco meyor les nuestres tradiciones.
Y lo más importante de too: Nun vos agobiar. Nosotres, como tol equipu de profes del cole solo pretendemos que podáis facer algunes cosines pa entretenevos, pasar meyor estos díes en casa y nun perder les rutines. MUNCHU PUXU!!!
Dexámosvos una plantilla de muestra por si decidíis la opción de facelo en papel y un par de semeyes más. Esto solo son exemplos, seguro que vosotr@s lo facéis muncho meyor.
Un abrazu y felices vacaciones.