Hola a toes y toos otra vegada más. Espero que téis bien. Ayeri foi el primer día que pudisteis salir a pasiar dempués de munches xornaes encerraos en casa y supongo que vos prestaría abondo y lo disfrutaríeis muncho; pero, ya sabéis........ munchu curiáu y precaución que'l bichu entovía anda sueltu.
Bono, güei voi dexavos la semeya d'un güevu pintu que se nos quedó perehí un poco despistáu, pero nun se nos escaeció, asina qu'equí tenéis el güevu de Leo, de 3ºA. A ver si lo que ta pintao n'él conseguímoslo enseguidina, ello ye la vacuna escontra'l coronavirus.

                                                     Perguapu Leo. ¡Munches gracies!

Tamién quería enseñavos güei unes semeyes que me mandó Pablo, un escolín de 1ºB, que tien muncha suerte de vivir nun pueblu, Pero, nun penséis que ye too tan guapo eh; que nos pueblos trabáyase asgaya. Nesta semeya vais ver a Pablo cola so prima faciendo una llabor comunal que, entovía, a día de güei  faise en munchos pueblos. ¿Sabéis qué ye?.... Pos, namás y na menos que la sestaferia. Una pallabrina mui prestosa que munchos vais deprender nesti momentu. La sestaferia ye un trabayu vecinal que faise en comuña nos pueblos pa iguar y llimpiar caminos, caleyes y cunetes; o seya, pa tenelo too bien adecentao y curiosino. Asina que otra vegada más vemos con esto que..... "xuntos podemos"

¡Asina se fai, Pablo! Hai que curiar los pueblos.

          Y esti, ye un mensaxe bien guapu, que tamién mos dexó Pablo nel so corréu.

                                                  ¡GRACIES!